கே.என்.நேரு மீது அமலாக்கத்துறை ஊழல் குற்றச்சாட்டு; லஞ்ச ஒழிப்புத் துறை விசாரணைக்கு தமிழக அரசு உத்தரவு .!

தி.மு.க மூத்த தலைவரும், நகராட்சி நிர்வாகம் மற்றும் குடிநீர் வழங்கல் துறை அமைச்சருமான கே.என்.நேரு தொடர்புடைய கடுமையான ஊழல் குற்றச்சாட்டுகளை முன்வைத்து அமலாக்கத்துறை அனுப்பிய இரண்டு கடிதங்கள் குறித்து விசாரணை நடத்த தமிழ்நாடு அரசு உத்தரவிட்டுள்ளது.

பொறுப்பு டி.ஜி.பி ஜி. வெங்கட்ராமனுக்கு அனுப்பப்பட்ட இரண்டு கடிதங்கள் குறித்தும் லஞ்ச ஒழிப்பு மற்றும் கண்காணிப்புத் துறை விரிவான விசாரணையைத் தொடங்கியுள்ளது என்று தி இந்து நாளிதழ் செய்தி வெளியிட்டுள்ளது.

மேலும், லஞ்ச ஒழிப்புத் துறைக்கு அமலாக்கத்துறை அனுப்பிய கடிதங்களின் நகல்களை தலைமைச் செயலாளர் முருகானந்தத்திற்கும் அனுப்பப்பட்டுள்ளன. இந்த முறைகேடுகள் குறித்து எப்.ஐ.ஆர் பதிவு செய்து விசாரணை நடத்துமாறு அமலாக்கத்துறை கோரியிருந்தது.

'புகார்கள் பெறப்பட்டவுடன், டி.ஜி.பி அதனை அடுத்தக்கட்ட நடவடிக்கைக்காக மாநில அரசுக்கு அனுப்பி வைத்தார். விரிவான விசாரணைக்கு உத்தரவிடப்பட்டதைத் தொடர்ந்து, அமலாக்கத்துறை முன்வைத்துள்ள குற்றச்சாட்டுகள் குறித்து லஞ்ச ஒழிப்புத் துறை விசாரணையைத் தொடங்கியுள்ளது' என்று உயர்மட்ட அதிகாரி ஒருவர் புதன்கிழமை தெரிவித்தார்.

ஊழல் புகார்கள் குறித்து வழக்கு பதிவு செய்வதற்கு முன், முதற்கட்ட விசாரணை மற்றும் விரிவான விசாரணை நடத்தி ஆதாரங்களை உறுதிப்படுத்தும் நடைமுறையை லஞ்ச ஒழிப்புத் துறை பின்பற்றுகிறது. "ஒப்பந்தங்கள் வழங்கியது மற்றும் வேலைவாய்ப்பு ஆகியவற்றில் நடந்த முறைகேடுகள் தொடர்பான சில ஆவணங்களை அமலாக்கத்துறை இணைத்துள்ளது. மேற்கொண்டு நடவடிக்கை எடுப்பதற்கு முன் உண்மைகளை நிலைநாட்ட நாங்கள் சொந்தமாக விசாரணை நடத்த வேண்டும்... இதுவே நிலையான செயல்பாட்டு நடைமுறை " என்று அந்த அதிகாரி கூறினார்.

கடந்த டிசம்பர் 2025-ல், தொடக்கத்தில் டி.ஜி.பி-க்கு அனுப்பப்பட்ட கடிதங்களில் ஒன்றில், நகராட்சி நிர்வாகத் துறையில் ஒப்பந்தங்கள் வழங்கியதில் "பெரிய அளவில் ஊழல்" நடந்திருப்பதாக அமலாக்கத்துறை குற்றம் சாட்டியுள்ளது. பல்வேறு திட்டங்களைச் செயல்படுத்திய ஒப்பந்ததாரர்களிடமிருந்து ரூ. 1,020 கோடி லஞ்சமாக வசூலிக்கப்பட்டதற்கான ஆதாரங்களைக் கண்டறிந்துள்ளதாக 258 பக்கங்கள் கொண்ட ஆவணத் தொகுப்பில் அந்த அமைப்பு குறிப்பிட்டுள்ளது. இந்த கண்டுபிடிப்புகள் கடந்த ஏப்ரல் மாதம் நடத்தப்பட்ட சோதனைகளின் போது கைப்பற்றப்பட்ட ஆவணங்களின் அடிப்படையில் அமைந்தவை என்று ஆதாரங்கள் தெரிவிக்கின்றன.

சந்தேகத்திற்குரிய நபர்களின் மொபைல் போன்களிலிருந்து எடுக்கப்பட்ட ஆவணங்கள், புகைப்படங்கள் மற்றும் வாட்ஸ்அப் உரையாடல்களை வழங்கிய அமலாக்கத்துறை, ஊழலின் உண்மையான அளவு இதுவரை கண்டறியப்பட்ட ரூ.1,020 கோடியை விட "பல மடங்கு அதிகமாக" இருக்கலாம் என்றும், இது குறித்து முழுமையான விசாரணை நடத்தி வழக்கு பதிவு செய்யுமாறு மாநில காவல்துறையை வலியுறுத்தியுள்ளது.

அமலாக்கத்துறையின் கூற்றுப்படி, லஞ்சத்திற்காக அரசு ஒப்பந்தங்கள் மற்றும் டெண்டர்களில் பெரும் முறைகேடுகள் நடந்திருப்பதை ஆதாரங்கள் தெளிவாகக் காட்டுகின்றன. அரசு ஒப்பந்த மதிப்பில் 7.5% முதல் 10% வரை ஒப்பந்ததாரர்களிடமிருந்து "கட்சி நிதி" என்ற பெயரில் அமைச்சர் நேருவின் உதவியாளர்களால் லஞ்சமாக வசூலிக்கப்பட்டதாக ஆதாரங்கள் கூறுகின்றன.

சமூகக் கழிப்பறைகள், துப்புரவுப் பணியாளர் குடியிருப்புகள் கட்டுதல் மற்றும் பழுதுபார்த்தல், துப்புரவுப் பணிகளுக்கான வெளிச்சோர்சிங் (Outsourcing) ஒப்பந்தங்கள் மற்றும் நீர்நிலைத் திட்டங்கள் உள்ளிட்ட அனைத்து வகை பணிகளிலும் லஞ்சம் கோரப்பட்டதாக அந்தக் கடிதத்தில் குற்றம் சாட்டப்பட்டுள்ளது. திட்ட அனுமதி மற்றும் பில்களைச் சரிபார்க்கும் பல்வேறு நிலைகளில் மற்றொரு அடுக்கு லஞ்சம் வசூலிக்கப்பட்டதாகவும், இது மொத்த ஒப்பந்த மதிப்பில் 20-25% ஆக இருந்ததாகவும் கூறப்படுகிறது.

பணமோசடி விசாரணை

முதலில் சி.பி.ஐ பதிவு செய்த வங்கி மோசடி வழக்கின் அடிப்படையில் அமலாக்கத்துறை நடத்திய பணமோசடி விசாரணையின் போது இந்த ஆதாரங்கள் கிடைத்துள்ளதாகத் தெரிகிறது. சென்னை, திருச்சி மற்றும் கோவையில் அமைச்சருக்கு நெருக்கமானவர்களின் இடங்களில் நடத்தப்பட்ட சோதனையில், நகராட்சி நிர்வாகத் துறை டெண்டர்களில் முறைகேடு நடந்ததற்கான ஆதாரங்கள் சிக்கியதாக சி.பி.ஐ கூறியுள்ளது. "குற்றத்தின் மூலம் ஈட்டப்பட்ட வருமானம்" தொடர்பான தகவல்கள் அடங்கிய பல ஆவணங்கள் மற்றும் டிஜிட்டல் சாதனங்கள் பறிமுதல் செய்யப்பட்டன.

அந்தச் சோதனைகளுக்கு அடிப்படையாக இருந்த வழக்கு அறிக்கை பின்னர் ரத்து செய்யப்பட்ட போதிலும், கைப்பற்றப்பட்ட வாட்ஸ்அப் உரையாடல்கள், புகைப்படங்கள் மற்றும் ஆவணங்களில் சட்டவிரோத ஆதாரங்கள் இருப்பதால், அவை மேல் நடவடிக்கைக்காக உரிய அதிகாரிகளிடம் ஒப்படைக்கப்பட்டதாக அமலாக்கத்துறை தெரிவித்தது.

முன்னதாக கடந்த அக்டோபர் மாதம், நகராட்சி நிர்வாகத் துறையில் பொறியாளர்கள் மற்றும் திட்ட அதிகாரிகள் நியமனத்தில் நடந்த ஊழல் குறித்து அமலாக்கத்துறை டி.ஜி.பி-க்கு கடிதம் எழுதியிருந்தது. இந்த இரண்டு வழக்குகளிலும் சேகரிக்கப்பட்ட தகவல்கள் பணமோசடி தடுப்புச் சட்டத்தின் (பி.எம்.எல்.ஏ) பிரிவு 66(2)-ன் கீழ் பகிரப்பட்டுள்ளன. இந்த புகார்கள் குறித்து விரிவான விசாரணை நடத்த எடுக்கப்பட்ட முடிவு அமலாக்கத்துறைக்குத் தெரிவிக்கப்பட்டுள்ளது.

இந்த ஊழல் குற்றச்சாட்டுகளை மறுத்து அமைச்சர் கே.என். நேரு வெளியிட்டுள்ள அறிக்கையில், "திராவிட மாடல்" அரசின் சாதனைகளைப் பொறுக்க முடியாத எதிர்க்கட்சிகளுடன் அமலாக்கத்துறை கைகோர்த்துள்ளதாகக் குற்றம் சாட்டியுள்ளார். பாஜகவின் கையில் அந்த அமைப்பு ஒரு கருவியாக மாறிவிட்டது என்றும், தன்னை இலக்கு வைத்து அவதூறு பிரசாரத்தில் ஈடுபட்டுள்ளதாகவும் அவர் கூறியுள்ளார்.