உலக கோப்பை கிரிக்கெட் திருவிழா; இன்று வெளியாகிறது அட்டவணை
admin
மும்பை: 13ஆவது ஆடவர் உலக கோப்பை ஒருநாள் கிரிக்கெட் போட்டிகளை இந்தியாவில் வரும் அக்டோபர் 5ஆம் தேதி தொடங்கி நவம்பர் 19ஆம் தேதி வரை நடத்த திட்டமிடப்பட்டுள்ளது. இந்தியாவில் முழுமையாக நடத்தப்படும் முதல் ஐ.சி.சி உலக கோப்பை தொடர் இதுவாகும்.
ரசிகர்களால் மிகவும் எதிர்பார்க்கப்படும் போட்டி அட்டவணை, போட்டிகள் தொடங்குவதற்கு சரியாக நூறு நாட்களுக்கு முன்னதாக, அதாவது இன்றைய தினம் (27, ஜூன்) மும்பையில் வெளியிடப்படுகிறது.
சர்வதேச கிரிக்கெட் கவுன்சில் மற்றும் இந்திய கிரிக்கெட் கட்டுப்பாடு வாரிய அதிகாரிகள் இந்த அட்டவணையை வெளியிட உள்ளனர்.
முன்னதாக அரையிறுதிப் போட்டிகளில் ஒன்று சென்னை சேப்பாக்கம் மைதானத்தில் நடத்தப்படலாம் எனத் தகவல்கள் வெளியாகின. ஆனால், நவம்பர் மாதம் சென்னையில் மழைக்காலம் என்பதால், அரையிறுதிப் போட்டி சென்னையிலிருந்து மாற்றப்படலாம் என கிரிக்கெட் வாரிய வட்டாரங்கள் தெரிவிக்கின்றன.
மும்பை வான்கடே மைதானம் மற்றும் கொல்கத்தா ஈடன் மைதானம் ஆகியவற்றில் அரையிறுதிப் போட்டிகள் நடைபெற வாய்ப்பிருப்பதாக தகவல்கள் வெளியாகி உள்ளன.
