2ஆவது 20 ஓவர் போட்டி; வெஸ்ட் இண்டீசுக்கு பதிலடி கொடுக்க இந்தியா தீவிரம்
admin
கயானா: மேற்கிந்திய தீவுகள் அணி – இந்திய அணிகள் இடையிலான 2ஆவது டி20 கிரிக்கெட் போட்டி கயானாவில் இன்று (ஆக.6) நடைபெறுகிறது.
மேற்கிந்திய தீவுகளில் சுற்றுப்பயணம் மேற்கொண்டுள்ள இந்திய கிரிக்கெட் அணி அந்த அணிக்கு எதிரான டெஸ்ட் தொடரை 1-0 என்ற கணக்கிலும், ஒருநாள் போட்டித் தொடரை 2-1 என்ற கணக்கிலும் வென்றது.
இதனையடுத்து 5 ஆட்டங்கள் கொண்ட 20 ஓவர் போட்டித் தொடரில் இந்திய அணி விளையாடி வருகிறது. இதில் முதலாவது ஆட்டத்தில் மேற்கிந்திய தீவுகள் அணி 4 ரன்கள் வித்தியாசத்தில் வெற்றி பெற்று தொடரில் முன்னிலை வகிக்கிறது. இதன் தொடர்ச்சியாக 2ஆவது இருபது ஓவர் போட்டி கயானாவில் இன்று (ஆக.6) நடைபெற உள்ளது.
முதலாவது ஆட்டத்தில் இந்திய அணி 149 ரன்னுக்குள் மேற்கிந்திய தீவுகளை கட்டுப்படுத்திய போதிலும், அந்த இலக்கை எட்டிப் பிடிக்க முடியாமல் தோற்றுப்போனது.
அந்த தோல்வியிலிருந்து விடுபடும் வகையில் இந்திய வீரர்கள் இன்று ஆட்டத்தை வெளிப்படுத்துவார்கள் என எதிர்பார்க்கப்படுகிறது. கயானா ஆடுகளம் பந்துவீச்சு மற்றும் பேட்டிங்கிற்கு சாதகமாக இருக்கும் என்று எதிர்பார்க்கப்படுகிறது. இந்தப் போட்டி இந்திய நேரப்படி இன்றிரவு 8 மணிக்குத் தொடங்குகிறது.
