விராட் கோலிக்காக உலகக் கோப்பையை வெல்க: வீரேந்திர சேவாக்
admin
மும்பை: 50 ஓவர் உலகக் கோப்பை கிரிக்கெட் போட்டிக்கான அட்டவணை அதிகாரப்பூர்வமாக அறிவிக்கப்பட்டுள்ளது. அதன்படி அகமதாபாத்தில் அக்டோபர் 5ஆம் தேதி நடைபெறும் தொடக்க லீக் ஆட்டத்தில் இங்கிலாந்து – நியூசிலாந்து அணிகள் மோதுகின்றன.
மொத்தம் 10 அணிகள் பங்கேற்கும் 13ஆவது உலகக் கோப்பை கிரிக்கெட்டிற்கான தகுதிச் சுற்று ஆட்டங்களும் ஒருபுறம் நடைபெற்று வருகின்றன.
உலகக் கோப்பைக்கான கவுன்ட்டவுன் தொடங்கிவிட்ட நிலையில், ஸ்டார் ஸ்போர்ட்ஸ் தொலைக்காட்சி நிகழ்ச்சி ஒன்றில் முன்னாள் கிரிக்கெட் வீரர் வீரேந்திர சேவாக் கலந்துகொண்டு பேசினார். அப்போது அவர், சச்சின் டெண்டுல்கருக்காக 2011 ஆம் ஆண்டு உலகக் கோப்பையை இந்திய அணி வென்றது போல, இம்முறை விராட் கோலிக்காக வீரர்கள் அதனை செய்திட வேண்டும் என்று தான் விரும்புவதாக தெரிவித்தார்.
கோலி ஒரு சிறந்த வீரர் மட்டுமல்ல, எப்போதும் மற்றவர்களுக்கு உதவ முயற்சிக்கும் ஒரு நபரும் எனவும் சேவாக் எடுத்துரைத்தார். விராட் கோலி சச்சின் டெண்டுல்கரைப் போன்றவர், கோலி விளையாடும் விதம், பேசும் விதம், விளையாட்டை அணுகும் விதம். அவரது ஆர்வம், அர்ப்பணிப்பு என அனைத்துமே நம்ப முடியாதது என சேவாக் புகழ்ந்துரைத்தார்.
விராட் கோலி எல்லா நேரத்திலும் நூறு விழுக்காடு ஆட்டத்தை கொடுப்பதாகவும் சேவாக் பாராட்டினார். விராட் கோலி எல்லா வகையிலும் சிறந்தவர் என்று வீரேந்திர சேவாக் பாராட்டு தெரிவித்தார்.
